发信人: sam-chan(♂夜观澜♂)
整理人: nanyuner(2003-08-09 01:27:36), 站内信件
|
寻日系七夕，好多人都觉得系“情人节”，唔知点解，可能系我资金本身冇情人抑或系点样，我完全冇果种feel，有人同我讲：“情人节应该开心D，就算系冇情人都好。”不过真系失礼晒，可能系因为胃痛咗几日嘅原因，我一直少少happy都冇。
可能做寡佬做得耐咗，自己都唔知系习惯咗定系麻痹咗，根本对情人E个概念都好模糊。人与人嘅关系就好似净系得翻“友情”以及“亲情”。人地好耐冇拖拍都会有少少自己俾自己嘅压力，搞到好多人都系抱住一个“年晚煎堆，人有我有”嘅心态去揾一个所谓嘅“情人”，满足下自己嘅虚荣心又好或者系舒缓一下自己心理嘅压力都好。
好多人觉得冇个人响身边，就会好空虚。所以不停去蒲bar落pub，夜夜笙歌，欢乐今宵。揾到一个当补数，揾到两个当执到。不过到头来多数都系“快上手，难长久”，好似一阵风咁就散咗，嘥钱兼嘥时间。所谓“欢场无真爱”，俾你揾到都冇用啦。咁样唔系对症下药嘅做法，就好似肚屙嘅时候俾粒“伟哥”佢食，食完系就系好劲，不过佢一样系屙到七彩咁样。其实又唔系好难理解咁样嘅心态，主要系身边嘅人个个都一双一对，自己就孤杯独醉，又真系几寂寞嘅。得闲有个人帮手冚下被，煲下汤水都唔知几盏。
终于的起心肝去揾个“肆肆正正”嘅人谂住做人世嘅时候，又突然间发现，原嚟所谓“好”嘅人差唔多死到七七八八。亲戚朋友介绍果D，唔系成个南下大军咁款，就系一条滚友咁嘅格，完全唔掂啊。唉！都冇脑嘅，边有咁大只夹乸随街跳吖，条件好就唔会洗人介绍啦。到自己揾到个合眼缘嘅，点知人地又对你嫌三嫌四。真系火都嚟，自问条件都唔差，唉～～～
讲到尾，感情嘅事随缘啦，亦都唔到你紧张。有嘅时候排满成条中山路任你拣，如果冇嘅，你去北京路步行街租个铺嚟sell都冇人会入。各位寡佬们，有嘅时候就请珍惜眼前人，冇嘅时候就唔该叠埋心水慢慢等。仲有，真系唔好相信果D所谓嘅“一见钟情”，冇益嘎～～～
----
藕丝已断 玉镜有裂痕 恩爱顿成怨恨
生则相聚 死也化蝶 几许所愿称心 |
|