发信人: boogeyman(卜/好爱水水吖~)
整理人: x_______x(2003-02-21 23:00:50), 站内信件
|
唔好人哋问下嘢就喺度话人哋白痴，话人哋傻閪。
边个冇初出茅庐嘅时候？边个冇无知嘅时候？边个冇需要人教嘅时候？冇需要虚心学嘢嘅时候？边个冇未成熟嘅时候？试下换咗你自己，你会有咩感受？
係，可能你已经好七叻，你乜都知，你老行尊，你好勼屎，不过唔好唔记得哩个世界山外有山、天外有天、人在人上、肉在肉中……边个都冇资格老串人哋。
人哋提出嘅问题，你唔识又好，你劲到爆又好，一係你懒得答就少句声唔好话人无知，一係就认真啲答人哋，有料嘅就好声好气教吓人哋。话唔埋人哋某啲地方比你叻十倍，话唔定请教紧你photoshop个手指仔点用嘅人係一个跨国公司总裁。人有各专，物有其用，总之做人嘅嘢留一条后路俾自己，留一条底线俾人哋。
仲有，有啲人成日觉得自己成熟，讲人哋幼稚。就我所见，真正成熟嘅人唔会随随便便话自己成熟，话人哋幼稚。反叛、急于表现自己、急于证明自我价值只係青春期嘅表现。唔係将自己啲嘢收收埋埋唔讲人知等自己消化就係成熟稳重，哩啲其实係懦弱嘅人保护自己嘅表现，表面自强，内里自卑。真正嘅强者敢于在人前表露自己嘅真实情感，敢于直面自己痛处，勇于以心交心，真正成熟嘅人乐于同后辈沟通，善于肯定别人、鼓励别人，而唔係否定别人。
仲有啲嘢，唔好觉得差就得个贬、觉得好就死话正，因为咁样做同嗰啲憎人富贵厌人穷嘅人差唔多。讲嘢俾啲道理，点解唔好，点解中意，唔好太肤浅，唔好懒有个性！因为哩度係网络，一个公众地方，人人都有眼睇，唔好搞到我哋俾人嘅感觉好似素质好低咁。
今晚突然反省自己，如有雷同，多多得罪！ |
|