发信人: boogeyman(★皇裔★)
整理人: kendya(2001-05-24 15:21:16), 站内信件
|
广州人游广州之夜间版——逃避现实的：二沙岛、陈家嗣广场
[适合时间：22点-6点]
[建议交通工具：私家车、的士]
一位DJ讲过“夜晚係逃避现实嘅时间”，我都几同意呢句话。辛辛苦苦工作咗一日，到咗夜晚三五知己一齐约出来，去玩下，淡下心，抒缓一下日间嘅压力。如果你已经厌倦咗落D落CLUB，又唔中意喺啡厅酒吧坐定定嘅话，游街就係一个几好嘅选择。以下为你介绍两个可供你游街嘅地方：
——二沙岛
我嘅提议係下昼来广州美术馆参观下展览，然后喺星海音乐厅隔离间嘢食晚饭，之后就入星海音乐厅听完交响乐就啱好十点左右啦（哇，好奢侈啊！）。夜妈妈喺二沙岛游游荡荡小心俾保安怀疑，都係乖乖哋就喺江边行下或着坐低倾下计好啲。呢度环境唔错，风凉水冷，前面係珠江，后面係星海音乐厅同广州美术馆。几个人或者係一对拖友企喺江边倾下计谈下心感觉几好，得闲就留意下江对面啲探射灯或者灯会变色嘅楼。比较可惜就係江边嘅灯11点就会熄，即使係咁我都会逗留到成点几先开车走人。再夜啲如果唔好彩嘅话你会见到啲阿SIR开住部三菱吉嘅警车开咪赶人，通常会话：“呢度治安唔好，唔好喺度逗留啦”，如果你个样猥锁啲就唔好意思——“唔该睇下你个身份证”。
——陈家嗣广场
去完二沙岛，经过7仔或者AMPM买啲零食饮料为到中山七路陈家嗣广场肚饿作好准备。如果你係开车去嘅就停喺广场出面68路车总站（6点前开走，如果唔係有两三部68路车会出现搞到你好难出车）。陈家嗣广场灯火通明，到凌晨6点先熄灯。喺广场度你可以行行企企，攰咗又可以坐低，环境咁好，贪心啲望多两眼都係啱嘅。一边倾计一边可以食下饮下啱先买嘅嘢，奉劝一句唔好做垃圾虫，广场大概每十几米就一个垃圾桶，举手之劳啫。如果人有三急行入啲就有公厕。公厕隔离係巷仔居民区，有人摆食档，烧烤、小炒都有。但我唔建议喺度食嘢，首先喺公厕隔离，食食下有阵风送下香就有你好受；其次惊唔多卫生；再次就係要食宵夜无谓缩埋一二角，嘥咗广场嘅美好景色。喺广场呢度可能会见到一两个阿婆阿伯晨运（我话凌晨运就差唔多，使鬼咁早起身咩）。讲完起咗身嘅就讲下未瞓嗰啲啦，有拖友啦、我哋啦、仲有三五七个夜不归家嘅少男少女喺度游荡。至于呢度嘅治安，我觉得都几好，因为广场公厕隔离有值班室，有管理员同保安巡视，只要你唔破坏公物唔扮盲流瞓凳佢哋就唔会理你。
[皇裔版权所有，转载请过问作者]
----
[型色主义]：
 ||欢迎参与[极限运动]
[地心吸力]：http://www.ylemcore.com
[自我介绍]：http://xboogeyman.yeah.net
[苦路十四]：http://boogeyman.yeah.net |
|
>>广州人游广州之夜间版——逃避现实的：二沙岛、陈家嗣广场