发信人: boogeyman(★皇裔★)
整理人: kendya(2001-05-24 15:21:16), 站内信件
|
广州人游广州之日间版——远离城市喧嚣：东皋大道、松岗小区
[适合时间：9点-18点]
[建议交通工具：公车、地铁]
大家会唔会觉得如果出街唔去娱乐场所，唔去繁华闹市逛街卖嘢就冇咩地方好去呢？
依家向大家介绍一下两个喺广州市区内但可以使你觉得唔似广州嘅地方，建议係广州人都去行下，你会对广州有另一种认识：
——东皋大道
东皋大道位于大东门附近，中华广场沿中山路西向行大概100米，你就可以见到左手边有一块“东皋大道”嘅路牌，唔好以为有“大道”两个字就好大，其实佢係一条巷。行入去，入面嘅建筑多为两三层嘅旧式别墅，唔好睇啲别墅比较残旧，但如果获得主人家允许入去参观下嘅话你会感觉到一种20世纪中叶欧陆风格嘅内部设计。多数住喺呢区嘅人有两种：一就係非富则贵好有料嘅人；一就係上一代係非富则贵好有料依家住紧祖屋。听讲有一户就係国画大师XXX（唔好意思，我见识少唔记得咗）嘅，不过佢去咗美国，间屋俾屋企人住紧，至于门牌我就唔方便透露啦。
呢入面嘅地价超贵，点解呢度咁好？原因有三：
一、旺中带静：一出去就陵园西嗰边，有中华广场同流行前线，仲有车站同地铁，又有广医。而入面东暖夏凉，环境恬静舒适；
二、治安好：唔同天河嗰类新发展区，见到嘅外地人少，贼人唔会知道呢条好似巷仔咁嘅街会住咗咁多有钱有势嘅人；
三、身份象征：你冇番咁上下有料都唔住得呢度，听讲呢度啲屋唔係有钱就可以买到咁容易。
——松岗小区
我通常都响流行前线个车站东向搭1路车，搭一个站就到1路车东山总站喇。一落车后向东行，即向东山区少年宫、七中嗰边行过去。你首先见到间唔算太大又唔算太显眼嘅日本料理店，唔好讲咁多，先喺度食一餐先，使下啲鱼生啦，寿司啦咁。个店长为人随和，同客人交流时好毕恭毕敬，好似啱从日本番嚟咁。食完后就继续向东行，大概50米之后你会见到一间陶瓷室，听讲係附属东山区少年宫嘅，不过大人都可以去玩。你买张百几蚊嘅会员卡就可以喺里面玩成日，买几斤陶泥，自己亲手做陶瓷，做好之后可以亲自摞去烧亦可以交钱托烧。喺呢度玩陶瓷一玩就起码大半日咖啦，都係唔好逗留啦，继续行，下次有时间再慢慢玩啦。一出陶瓷室门口就正对住寺贝通津。咩话？“寺贝通津”，咩嚟咖？路名嚟咖，我阿爸话广州以前好多路仔都叫乜乜通津，不过好多改咗名啦。行入寺贝通津会见到一间基督教堂，环境唔错咖！星期六日去就最好，教会会组织好多活动，讲经啦、唱圣歌啦等等，你可以坐入去听埋一份（“God loves everybody”，哈哈）。参观完教堂就继续行，喺寺贝通津左川右插，你会发现呢度有一间学校、三间幼儿园、东山区教育局仲有一间好似大使馆嘅律师事务所。不得不提嘅係松岗东48号别墅，住得呢间正嘢嘅人肯定唔简单！好啦，之后继续行就出到大马路啦，呢条路叫达道路，附近有军区，好多军佬啦，真真假假嘅军牌车啦，比较乌烟瘴气啲，所以行程就到此结束啦。
虽然未确切了解过，但我相信呢度嘅地价都唔平得去边，因为：
一、都係旺中带静，从幼儿园到小学中学都有，又有东山区少年宫，行出去就係东山最旺嘅商业区农林下路。
二、治安都好
三、环境舒适，住喺度命都长啲
[皇裔版权所有，转载请过问作者]
----
[型色主义]：
 ||欢迎参与[极限运动]
[地心吸力]：http://www.ylemcore.com
[自我介绍]：http://xboogeyman.yeah.net
[苦路十四]：http://boogeyman.yeah.net |
|
>>广州人游广州之日间版——远离城市喧嚣：东皋大道、松岗小区