发信人: jason_choi(仁面秀心--大头成)
整理人: cywx(2001-02-19 01:31:28), 站内信件
|
今晚，大P，大Y，四眼仔，亚聪，斯女，朱咪咪，驱风老怪，石仔同埋我一行人去市二人民医院探望我哋嘅好朋友何浩宇。
见到佢，一头长发剪短咗好多，人嘅面容都不比以前神彩唤发，但系仍然不失风流倜傥。见到咁多好朋友去探望佢，佢好开心。并且一一多谢关心佢嘅，去过或者未去过探佢嘅朋友。
据佢妈妈讲，佢今次系因为肾功能有问题，做成贫血同埋尿毒症而入医院嘅。佢呢排工作繁忙，经常做到夜晚两三点，第朝八点钟左右又爬起身去返工，周而复始，都未能得到充分嘅休息。
年初一嘅时候已经因为急性肠胃炎进医院急诊，但系当时并未发现问题有如此严重，返到屋企之后并未有好好及时咁休息。渐渐身体就觉得好疲劳，但系自已以为系唔够瞓，谂住后生，死顶落去。但系人始终系肉做。最终喺上个星期，发现眼花，同埋四肢无力，到咗上个星期二终于入咗市二医院 。
宜家医院要同佢做血液透析，作用系将血液里面嘅毒素排出嚟，每个星期要做两三次。同埋同时畀适当嘅药物去保养个肾，以恢复肾嘅排毒功能。通过呢个疗程之后再观察一下个肾功能能否回复，最坏情况，如果唔可以恢复个功能嘅话，先至考虑换肾。并唔系好似以前啲人讲过话星期五做换肾手术咁严重。上个星期五嘅小手术系喺身体上开一个穿刺孔插导管以方便 做血液透析嘅。大家可以放心。
佢而家暂时都唔可以随便 进食大家带去嘅生果同食物，如果真系有心嘅话，可以考虑一下一束鲜花或者一啲解闷嘅书籍杂志。佢妈妈好多谢大家对何浩宇嘅关心。
我哋成班朋友都衷心祝愿我哋嘅好朋友何浩宇可以快啲将身体调理好，快啲可以返到我哋呢个大家庭中间。同大家一齐再开心。
同埋亦都忠告仍然健康嘅你，唔好因为某啲游戏嘅精彩或者OICQ上某啲人嘅心有灵犀就不计日夜咁样上网，唔好因为因为一时嘅开心而颠到日夜，长期咁放纵自已，因为咁样都会对身体百害而无一利。最终结果系自已同埋至亲嘅人去承受呢啲苦楚。来日 方长，又岂在朝朝暮暮呢。早啲休息啦，唔好少过七个钟头嘅睡眠时间啊，长期咁样真系对个身体冇益咖。
好了，最后再祝福一次何浩宇可以早日康复。
----
大千世界，無掛無碍，自去自來，自由自在，要生便生，莫找替代。
《無名偈》 |
|
>>给关心HOHO的人