发信人: jason_choi(仁面秀心--大头成)
整理人: cywx(2001-03-03 10:27:02), 站内信件
|
星期日做咗只超级大闷狗 ，一个人去图书馆还书，我啲书过咗期十几日了，今日再唔还，就要等多七天。
上咗去图书馆嘅车，再到两个十二三岁嘅妺妺，一个戴眼镜，短头发，一个扎住马尾。两个人都同时食住五毫子一支嘅棍仔糖，由于车上人迫，我企喺佢哋嘅坐位隔离。行近咗，睇到四眼妺正喺度睇紧一路食棍仔糖一路睇住一本笔记簿之类嘅嘢，一路睇一路问马尾女仔啲嘢，我估到四眼妺睇紧马尾女仔本日记，细心观察咗一下，不出我所料，里面幼稚嘅笔迹记载住少女嘅心事，谂起我同样年鹷嘅时候，用文字根本抽象唔出我一日做过啲乜嘢，如果的确要记录，恐怕亦都系一本无聊嘅流水账。马尾女仔嘅形象突然喺我眼前高大起来。好奇心驱使之下，我决定偷睇一下佢写啲乜。但系可惜我对眼近视又冇戴眼镜，睇到写咗啲乜嘢，但系呢次嘅注视使我发现原来佢本日记系有锁嗰种。
一本带锁嘅日记本意味住乜嘢呢？里内满载着少女心事，只可用笔尖向白纸倾诉。。。但系点解会轻易就将心事向另外一个人毫无保留咁敞开？
我都有两本日记，不过全部都记录喺我嘅脑内，一本系带锁嘅，一本系无带嘅。无带锁嘅一本日记可以任由旁人取阅，可以系四眼妺手上嗰本马尾女仔嘅日记，里面记载住我每一日嘅喜怒哀乐，每一日接触过嘅人。每一件想同朋友，亲人分享嘅事。
另外一本系带锁嘅笔记本，里面记载嘅内容唔系好多，不过每一个字都系经过一百二十位加密算法嘅密码，只有我呢个解码器可以解到出嚟。当然，锁匙亦都只系有一条，永远唔会遗失，旁人点都抢唔走。
随着年月嘅冲刷，自已或者旁人嘅取阅，无带锁嘅日记可能会丢失其中几页嘅内容，可能其中有啲字迹会花咗。可能日记畀人抄咗去当作文贴堂。。。但系带锁嘅日记永远系独处时一个人静静嘅品味，深深咁回忆，不时发出一两声会心嘅微笑。里页同埋字迹永远都唔会遭受破坏。
两支白色嘅棍仔飞出窗外，“唔该借借”同样两个少女亦都到达佢哋嘅目的地。你两个啲嘢又畀我写入冇锁笔记本。。。
----
话我花心？我系花生啊。花花世界中一个纯情小生。
|
|
>>见诚随笔>>见诚随笔--带锁嘅笔记簿