发信人: jason_choi(笨小孩（甲）大头成)
整理人: cywx(2001-01-26 04:56:36), 站内信件
|
中午十二点三，深南中路嘅肯得基餐厅，啱啱喺爱华电脑城买完只翻版繁体视窗九八第二版嘅我攞住份套餐揾位坐，呢个时候正值食晏，揾个位真系难，可见深圳人都几有米，终于揾咗个位坐低，呢个位系专门为啲父母而设嘅，佢可以好近距离咁睇住佢哋嘅心头肉喺儿童乐园里面玩紧啲开心情况，实现亲子同乐，我同呢啲幸福无缘，我坐喺度只系因为揾唔到其它更好嘅位。坐喺我隔离系一男一女，听佢哋嘅倾谈系两公婆，佢哋望住自已嘅心肝喺度玩滑梯。男嘅赞自已个仔好好修养，女嘅就赞自已个仔聪明。六只眼内里不时流露住幸福嘅眼神。突然间，佢哋个仔跌咗落个地度，佢嘅双亲大为紧张，闪电之间就冲到个仔身边扶起佢，极之关心咁问佢有冇事，呢个动作嘅时间不过五秒，仲差啲整反我杯汽水添。我当然冇责怪佢嘅谂法啦。睇住佢个仔喺双亲嘅怀中不住嘅喊，突然之间觉得佢好幸福，可能尽情嘅用泪水发泄住佢嘅委屈。
一路以嚟，学校、社会畀我哋教育系，如果你想幸福，咁你就要处处强过人，你就要周身法宝，你就要百毒不侵，但系你睇呢个细路仔，乜佢拥有呢度其中嘅一样咩？佢宜家唔系集万千宠爱在一身，唔系幸福咩？
唔通一直以嚟嘅灌输畀我哋嘅教育系呃人嘅？唔通根本就系错嘅？
真系想同同事讲，你哋眼中嘅Jason其实做唔到星期五下昼四点半到五点九呢一个钟头零三个字里面，可以喺第一次去嘅深圳市郊睇三间屋，同埋评出佢哋之间嘅好坏，唔可以睇过两间家俬铺，记低所需用品嘅格钱，同埋写好传真传返公司咖，佢唔可以喺四个钟头之内去深圳三个地方，为两个客户就做嘢，仲带埋啲钱畀你哋喺深圳嘅同事咖。
我想同公司啲客户讲：其实去你哋公司度做嘢嘅肥仔，可以系唔识CRYSTAL REPORT报表设计、ACCESS数据库嘅设计、ORGANIZATION CHAT嘅用法，唔知点解用用吓COREL DRAW 点解会死机、唔知NOTES 个REMINDED点设咖。。。
我想同啲同学讲：大家一样学咗三年电子，无理由我识整电视机，但系你连边只系稳压二极管都唔识咖，冇理由我识整部CD机，但系你连佢个掣坏咗都检查唔出咖！大家同样读咗四年电脑，你竟然连铲咗个WINDOWS 嚟重装都唔识？连只内置MODEM嘅DRIVER都装唔到？HD COPY都唔识用？唔系嘛？乜话？装个FORMAT个C区惊住连D区啲数据都冇埋而唔敢做？
我想同啲亲戚讲：其实我都唔系好清楚你用嘅手机究竟入联通好定系中国移动好咖，入网好定系用储值卡好咖。我唔系卖手机咖，我亦都唔可能只只手机都用过，边只手机好我都系靠听番嚟加咋。。可能我建议买嘅DVD机唔系最好咖！同埋我去买都可能买到坏机咖。。做乜对自已咁冇信心啫。
呢啲事太多太多，好似我边度知边度有冇邮政编码嘅信封买啫，我点知呢排有乜港产片好睇啫，我点知呢个星期六有乜节目啫，我点知边个同边个又散咗跟住又同边个勾搭上啫！
我都有软弱嘅时候，我都有时想揾个膊头挨吓，我都有时会迷茫，我唔开心时都想揾人倾诉下，我都有啲嘢唔知，我都有时立唔定心水，我都想有番自已啲时间想下嘢，我系人嚟咖，我唔系铁甲万能侠啊！
左心房度有把声音喺度同右心室讲，细路！做啦！呢啲系耕耘，以后就会有收获咖啦！因为你叻仔，所以呢啲你系应该做咖。右心室回应话，呢啲耕耘几时先有收获啊？我惊我都捱唔到自已收获嗰日啊！唔系叻仔嘅人先至会得到幸福咩？唔系应该更快啲享受到幸福嘅果实咩？点解我做嘅嘢会畀人多啫？心理好唔平衡啊。。。。
有乜用啊！本来有啲嘢就系唔平衡嘅，好似个心都唔系生嚟人嘅中间，而系偏左啦！或者呢啲就系命运注定啦！只表D一声响起，打断我思绪，睇睇都一点钟了，走人搭车去天安大厦。。。。
发泄完了，无奈咁断续我嘅生命之路啦。。。。。吓？想问下洗镭射唱头用乜好？梗系唔好用酒精啦，连无水酒精都唔好用啊，因为内含嘅水份会洗咗佢啲滤光膜咖，就咁用干棉签抹啦。。。。。。
----
情多再莫醒，醒莫再多情。 |
|
>>心情日记>>铁甲万能侠？