发信人: jason_choi(戥穿石(戊))
整理人: freeforall(2003-05-04 02:10:17), 站内信件
|
今日係情人節，本來好應該咀多幾咀。但係，有鑑於同埋有「尷」於近日有肺炎恐慌，所以奉勸啲「絕世大淫魔」千祈唔好見嘴就咀，就算忍唔住，最好都係做足預防措施，好似話戴定個口罩先至好咀，如果冇口罩的話，戴狗罩都無妨，反正閣下都係狗公一條，睇落都襯嘅。
當然，如果閣下覺得戴咗口罩，或者狗罩會影響你嘅尊容，搞到你唔夠「八両金」咁靚仔，咁就不妨用保鮮紙包住把口都得，勝在透明同埋貼嘴。不過，如果你重係有啲驚，咁就要買桶白醋返屋企，一來用嚟漱口，二來用嚟沖涼。白醋最近好搶手，可能唔係咁易買到，就算買到都唔會平。所以，如果你真係買唔到，又或者真係嫌貴，照計，根據曾緊榮老師嘅必殺技，買桶哥士的都應該一樣使得。哥士的連通屎渠都得，試問用嚟抗吓肺炎咁小事又點會唔得呢﹗何況，大部分民間療法都係斷估冇痛苦嘅，所以斷估哥士的都一樣得啫，嗄話﹖
此外，情人節亦都唔少得燭光晚餐。今次，閣下亦都可以趁住肺炎恐慌嚟搞搞新意思，即係唔使咁花錢請件「人形豬扒」食心形牛扒喇，反而可以大條道理請佢食酸薑蕎頭之類嘅鹹濕嘢就得，理由自然係因為呢啲鹹濕嘢含有豐富嘅白醋成分，食咗包保可以預防肺炎，於是亦都可以放心咀嘴，既經濟又實惠，你話係咪好過制呢﹖
總之，喺肺炎恐慌下，今個情人節，最有機會做到本小利大，恭喜﹗
|
|