发信人: kalli23(小娜)
整理人: jonthen(2004-02-18 20:28:54), 站内信件
|
我屋企有两个狗狗，一个叫莉莉，一个叫豆豆。讲起距地就多野讲咯。我养距地已经养左十年了，莉莉系妈妈，豆豆系女女。十年我地之间有好深厚既感情。
我先讲莉莉啦，莉莉是一只西施狗，其实我养距个时距已经有一岁几既啦。讲到距既来历都几奇妙架。距系我阿姨一个亲戚既自来狗，其实莉莉应该系好纯种既，我谂距可能系同距主人走失既。因为，后来养距发现，距好高贵同埋好有性格架。而且距仲好出得大场面，唔同其他既狗仔，人多就会惊。我阿姨话距可能见到我阿姨既亲戚屋企好靓就走左入去，其实距地都好钟意莉莉架，但系因为距地屋企系铺地毡，莉莉D毛毛好难吸，所以就俾我养啦，其实系养莉莉之前，我屋企已经养过好多只狗狗既啦，因为我爸爸都好钟意狗既，但系以前养果D都系大狼狗，听话就真系好听话，不过，好鬼大力同好恶架，就系听我爸爸话，我放距地出去果时都拉唔住距地架，加之我妈妈又唔系好钟意，所以，后来就全部俾左人啦，有一只我记得仲好似俾左我地果到既警队添啊。
我系独生女，所以爸爸妈妈就话怕我闷，刚好阿姨又话有条甘既狗，而且当时我地果到都没开始兴甘种宠物狗架，有一只甘既狗仔系有钱人既身份来架。所以，我当然系急不及待甘去接莉莉返屋企啦。
我好记得架，果日爸爸要开工，我妈又要上班，系我同我阿姨去接距返来架，当时我去到我阿姨个亲戚到，一见到距就已经好鬼死钟意了，当时既莉莉全身都系纯白既，有少少黄毛，少少，眼仔大大，果个样啊，你睇到就钟意，而且距好有性啊，距知道我会系距以后既主人啊，我拍拍距既头，距就已经走埋来训系我身边啦，动都唔动啊，真系乖到乜甘啊，距原来先养左距二个星期既主人话距好听话，好有性，距都好唔舍得送走莉莉，我同距既主人倾左一下，距话莉莉前一晚就知道距要离开距地啦，仲哭添啊，然后我低头睇吓距，发生距真系眼泪汪汪甘，我细细声同距讲咯：“你放心咯，我会好锡你架”距好似听明甘啊，舔左一下我既手。然后我俾左封利是俾我阿姨既亲戚就将莉莉带返屋企啦。俾封利系我屋企既习惯来既，系希望狗仔来到我屋企后吉吉利利，平平安安。
我一带左莉莉返屋企，我屋企人就已经好钟意啦，因为距真系好靓啊。系当时我地屋企果边距甘种狗系好值钱架。但系莉莉就认定我系距主人啊，距个个都唔跟就系跟住我，连我去厕所都要跟架，我系我房间放左一张藤椅俾距做床，开头距都好乖甘系果张藤椅到训既，后尾就唔系啦，要上床同我一起训。我以前屋企系住果种私人屋，就系自己起既，有三四层楼果种，屋企离河边好近架，我天天下午放学就带距去河边散步，我屋企附近仲有一个好大既操场，我地就经常去果到玩，莉莉好乖，根本就唔驶用狗绳架，出到外面，个个都话哗，只狗仔好靓啊，好似波斯猫甘，然后果个野就好似识听人话甘，好得戚既抬起个头来行既啦，开头边个都唔跟，就跟我，后尾同我屋企人熟左就好鬼识得炸娇了，刚刚来我屋企既时候吃好少野架，就吃鸡蛋甘大既饭量，后尾，我地帮距找左只京吧来配种，系纯种京吧哦，然后我妈就好似当距坐月既，又煮鸡蛋炒饭，又煮鱼汤俾距吃，依家就好鬼大吃了。
距生左三只狗狗，一个狗公仔，两个狗女仔，其中狗公仔就俾左我阿姨养，我表弟都好鬼钟意距架，叫龙龙，另一个就俾左我对面既叔叔，叫嘟嘟，不过，后来距太太唔钟意就送左俾人了，我后尾就唔再帮莉莉配种了。因为，我觉得距生完狗狗之后就没甘靓咯，D毛既颜色依家已经唔系以前果种纯白啦，D黄色越来越多。仲有一只就我自己留落来，就系依家既豆豆，距就似距爸爸，混种既京吧狗仔。
后来，我屋企搬左去商品屋，仲要住到九楼甘高，就少左带距地出去玩咯，莉莉系我心目中系没野可以代替既，距陪我经历左唔少事情架，当然豆豆都系。距地两个既名合起来叫阿莉阿豆就好似日本既“阿莉阿哆”就系多谢甘解咯。
好啦，讲完莉莉就讲吓豆豆啦，豆豆系莉莉生既狗仔里面最细既一只，从细距就好细只，吃奶又吃唔赢其他狗，又多病痛，整日都肚泻，细细个就因为肚泻要分开来养，仲享受最好既环境，距出世果时系冬天，我地将距分开养，就怕距冻到，就用热水袋包毛巾俾系我枕头边晚上俾距训，不过，甘个野啊，好鬼古惑架，细细个就已经知道边个系一家之主，最听我爸爸话，我爸爸一返来就锡到我老豆整脸口水，一定要我爸爸抱过距先得架。又持细行凶，经常吓距妈妈架，次次吃饭都系距吃完莉莉先去吃既。又调皮，如果我地晚上出街耐D距就鬼杀甘吵既啦，次次都叫到眼又红又呕架，仲做坏事，莉莉就系俾距带坏既。不过，有左距地两个又真系有好多乐趣既。
距地真系好有性架，我爸爸系97年出事，过左身，系俾人谋财害命，当时找都找唔到啊，距地两个晚晚都坐系门口到等，一晚都唔训啊，就系坐天光，然后当知道真系出左事果时，豆豆就躲系台底几天都唔出来，莉莉就失心疯一样，系厅果到周围甘尿尿，仲经常全身打抖。
有一段时间，因为爸爸既事，妈妈心情好差，见到距地就会谂到爸爸，妈妈就唔想养距地，但系我唔制，我话将距地放系我同学到养一段时间先啦，等妈妈心情好再接距地返来，后尾系我同学屋企养左一个月，我同学话距地两个天天都唔多吃野，一到平时既七点就坐系门口到，哎，平时七点几我爸爸就返拉，距地就去接距咯。
终于妈妈心情好返好多既时候，我就将距地接左返屋企，距地就真系好有性啊，莉莉返到来就边到都唔去，就爬系我身边，阿豆就爬系妈妈身边，我一哭，莉莉就马上伸个头来帮我舔眼泪，我训系到距就又训系到，一点都唔行开架，阿豆又系甘对我妈妈，我同我妈妈当时真系好感动，觉得距地好似商量好甘来陪着我地。
经过好长既时间，我同我妈妈都系爸爸既事情中慢慢坚强起来，面对新既生活，其实莉莉豆豆真系带俾我地好多欢乐架，我妈忙着煮野俾距地吃，帮距地冲凉，打扫狗毛，没甘多时间谂甘多野，心情都好左好多，我就当然唔驶讲啦。我玩电脑，我弹琴，莉莉都会系我旁边一步都唔行开，我妈如果一个人系厅睇电视，豆豆就死都要距抱既啦，仲识得用个手仔来挠我妈既手要距抱架。我同我妈都觉得距地两个系用个心同用行动来安慰我地，照顾我地架，其实唔系时时都系我地照顾狗狗架，好多时我都觉得距地系到照顾我地，陪伴我地。
后来，我毕业了，我要离开屋企出来广州做野啦，差唔多三个月先返去睇距地啊，我真系真系好挂住距架，但系又因为有距地，我妈妈先唔会一个人甘寂寞，我又真系真系好多谢距，距地两个既名合起来系日本话中多谢甘解，其实唔系距地多谢我地养系我地多谢距地甘忠心甘系我同我妈妈身边陪伴我地。
可能系爸爸保佑了，系广州终于都俾我稳定落来，我老公系省府人事厅，距用关系将我调到省统计厅。妈妈又系今年再次结婚了，但系妈妈新屋果到因为已经有两个狗仔啦，所以就没将莉莉豆豆接去果边住，但系就天天晚上返去喂距地，我今年国庆就唔返去睇距地了，因为，我同老公已经决定供屋，国庆要去睇楼，而供楼既最大动力就系要将我莉莉豆豆接来广州，我要日日都同距地一起，所以，国庆唔返去睇距既代价就系争取今年年底将距地接来广州同我一齐，我知广州打狗，我同老公都讲过甘怕唔怕，开头老公唔赞成接距地落来架，后尾，听我讲左距地既事就话，唔怕，就算打狗都要接距地来广州，因为，距会保护距地，唔会俾任何人动到距地一条狗毛，因为距地系我最亲既人，最亲既狗，最亲既朋友。我好开心，我会努力做野，快点接距地来广州同我团圆既。
莉莉豆豆既故事就讲住甘多先，多谢大家睇距地既故事。以后我会继续将距地既相片，距地既搞笑野，感性事，开心，唔开心既故事再一一细说。系甘到亦希望你地每一位狗主都同你地既爱狗幸福快乐！狗狗就健康听话，主人就如意平安。
|
|