|
发信人: twinsqq(AngelBlue) 整理人: yong1015(2003-08-20 11:56:37), 站内信件 |
|
楊千嬅-為《新紮師妹》落口供 香港電台早前舉辦了一個「銀幕上十大理想警察」的選舉，雖然成龍、李修賢(CID)及王敏德(飛虎隊)都大熱勝出，但心裡總覺得好像欠了甚麼，或者是因為「方麗娟」並沒有入圍。雖然她駐守慈雲山警署小小的失物認領處，也有本事弄至烏龍百出，但我相信，她其實是香港開埠以來最受歡迎的女警。 由於「方麗娟」上集立了功，所以今集一出場，膊頭就多了兩粒花。但烏龍百出的她好快又俾人降職，但她仍然一貫樂觀開朗。為了再次以臥底身份完成任務，她會以俄羅斯跳舞女郎、PTU、名媛及斯文返工look的造型出現。她最喜歡第一個造型，因為造型極似藍寶石王子。 「方麗娟」跟楊千嬅的共通點是大家都鍾意笑，樣樣事都用輕鬆態度面對。但現實中的她比「方麗娟」理性，不會咁感情用事，輪盡同撞咁多板。講到做喜劇，並唔係大家想像中的容易，其實係有一定難度，生活上遇到好笑的事要記住，將來可能用得著。周星馳做開喜劇，更憑《少林足球》榮升影帝，雖然楊千嬅自覺跟周星馳無法相比，但都希望自己可以在一定空間發揮到喜劇效果。 喜劇的特色係導演會度好多punch line (妙句)令每個演員的性格都好特出。有時碰到可以交流到的對手，爆肚的情況都會出現，導演有時又會選來用。 喜劇其實同音樂一樣係國際語言。2001年，她好榮幸可以參加烏甸尼斯影展的「見面會」，跟觀眾一同看《新紮師妹》第一集的首映。他們大部份都係意大利人，銀幕放映的是廣東話版本，但傳譯員會即場翻譯做意大利文，觀眾一邊看一邊都發出好多笑聲！ 不過她最鍾意的劇種，大家一定估唔到，就係文藝片，最喜歡的明星就係蕭芳芳，因為她做喜劇及文藝片都一流！楊千嬅其實唔係一定要拍喜劇，呢個係巧合，因為現時整體社會好緊張，經濟氣氛又唔算好，所以電影公司多數開喜劇，就算唔係主流喜劇都加入喜劇元素，為大家帶來歡笑。 《新紮師妹2》 第一日開工，她就要吊威也爬金貿大廈，個心都好驚：「死啦！懸空四十尺喎！」 但拍完又好似坐完一次過山車，好緊張但又好開心。除此之外，又要應付好多飛身、翻騰及跳躍的高難度動作，她笑言，國際級動作女星有楊紫瓊，香港就有個楊千嬅！ 江玉儀-孕育水瓶座「方麗娟」的人 《新紮師妹2》的監製有兩個，分別是馬偉豪及江玉儀。是馬偉豪孕育了「方麗娟」的名，因為他的家姐叫「馬麗娟」。而江玉儀孕育的好可能是「方麗娟」樂天開朗的性格，因為她也正是這種人。 那一個時刻，令你們盟起拍攝《新紮師妹》續集的念頭﹖ 第一集出來的票房都幾ok，加上「方麗娟」個角色如果玩落去都幾好玩，所以大家就決定拍續集，可以的話，仲想第三集、第四集拍落去，不過當然要加入一些新元素。我幾愛「方麗娟」呢個角色，因為呢個人唔係好有錢，又唔係好靚，但善良、無機心，所以傻人有傻福，反而得到好多她唔預期有的東西。 之前跟你談過星座，你覺得「方麗娟」是甚麼星座﹖ 我其實唔係好熟咋！ (笑) (想了一會) 佢一定唔係天蠍、處女同獅子座，應該係少少水瓶加白羊座。因為佢係開心就笑，唔開心就喊的人。 雖然「方麗娟」烏龍百出係必須的，用來製造喜劇效果。但她始終有過破案經驗，比起上集，角色有成長到嗎﹖ 佢都有成長的，不過在畫面上出現烏龍野真係幾好拍，而且我覺得烏龍係生出來的，好難去改的，所以佢都仲係幾輪盡。 女性觀眾可以好容易代入方麗娟的角色，那男性呢? 係咪都只係俾女朋友拉入場﹖ 我地無做好正式的研究，不過對好多女仔來講，方麗娟的確為她們帶來了一個fantasy。順帶一提，香港長大的女仔唔知點解都幾矜貴，香港男仔都幾聽女朋友話，叫佢入場睇戲就睇戲。 楊千嬅在戲入面算唔算做返自己﹖ 其實每個人都會有多重性格，「方麗娟」個角色同楊千嬅呢個演員，係在某一些位置上meet到，但我絕對相信楊千嬅都有第二種同「方麗娟」唔同的性格。調返轉，「方麗娟」呢個角色亦可以拍一套文藝片，因為佢都可能有沈默的一面。 比起上集，《新紮師妹2》多了另一個賣點──楊千嬅拍動作戲﹖ 吳彥祖都有打，問你死未﹖！ (笑) 「方麗娟」作為一個警察，始終都係要打返三五七「野」，但打法當然唔係《英雄》的方式，會係用攪笑的方式去打，但就有武術拍導協助。千嬅第一日開工就爬上海的金貿大廈執行任務。 《新紮師妹2》是一張張上海明信片，它在那裡取過景﹖ 有和平飯店頂樓、浦江飯店、金貿大廈、改裝教堂的俄羅斯餐廳及最具上海特色的街。 資料來源︰電影雙周刊 (撰文︰直子) ---- QQ：85564724 WELCOME TO THE MUSIC WORLD~~~~~    
   
 
 
|
|
[关闭][返回] |