发信人: fion96143(豬事丁)
整理人: cutecat(2002-05-17 02:50:43), 站内信件
|
從黎估吾到咁戲劇化嘅事會真係發生，仲係發生係我自己身上。果時係99年，我初初上網，我身邊d朋友一直叫我去聊天室玩，但係我冇咩興趣，只係上網睇新聞，收發郵件。
直到某次我發生左一件好傷心嘅事，就將自己鎖係書房一邊喊一邊上網，我記得自己係新浪見到彈出一個聊天站廣告窗，我就click入去，想搵人傾訴下。入到聊天室，因爲我吾識人，冇人理我。我岩岩打算離開嘅時候，一個叫做TT嘅男仔主動同我講野，佢好耐心好溫柔咁安慰我，仲比左好多中肯嘅意見我添。我對佢印象好好，可能因爲冇經驗啦,我冇留低佢聯絡方式。
之後嘅幾個星期，我一直係新浪徘徊，想搵翻果個廣告窗，想再去搵佢，但係一直搵吾到。到我再次入到個聊天室嘅時候已經係差吾多一個月之後嘞。我日日係聊天室度停留好長時間，希望可以搵到TT，但係佢一直冇出現過。慢慢，我係聊天室識左好多朋友，一日吾去就周身吾舒服。
有一日，一個叫做BIGWORM嘅男仔主動同我搭訕，問我記吾記得佢，我確實對佢冇印象，以爲佢係用呢條橋黎識女仔。佢見我話吾記得似乎有D失望。但係以後差吾多每日都會見到呢個BIGWORM，佢係果種好調皮，成日同我頂頸講笑嘅男仔，我對佢冇咩特別感覺，只不過同佢互相窒黎窒去都幾開心。可能又過左幾個星期啦，我係聊天室同BIGWORM傾緊，突然見到一個叫做TT嘅人入左黎，我即刻同呢個TT講，我搵左你好耐啊，你仲記吾記得我啊？個TT好愕然咁話，我吾識你嘅播。我覺得好尷尬，BIGWORM就係旁邊搭爹話，你搵我咩，我就係TT啊嘛。我以爲佢好似平時咁落井下石，KICK左佢幾下。點知佢很認真咁話比我聽，佢有幾個ID，果晚佢用嘅係TT，但係佢一般係用BIGWORM，佢一見到我就認得我嘞，但係佢吾記得左自己第一次同我講野嘅時候用嘅係果個名，佢仲以爲我吾記得左佢添。我仲係好難相信，因爲呢兩個人比我感覺太吾同嘞，直到佢將佢保留落黎果晚嘅聊天紀錄寄比我睇，我先敢相信呢兩個係同一個人。真係好難描述我當時嘅心情，第一個反應係，點解咁似睇緊電影嘅？？？？
之後嘅事可能大家都估到，我可能係第一晚已經中意左佢。發生左呢件咁曲折嘅事更加大大促進左我地感情嘅發展，兩三日後我地就開始網戀。雖然我地始終係好耐之前已經分手收場，而家事過境遷，我始終多謝佢帶比我咁浪漫嘅初戀，同埋咁美好嘅回憶。 |
|