|
发信人: gamba(VR射手修炼中) 整理人: kobayakawa(2002-03-13 23:29:11), 站内信件 |
| 如果各位有去过香港，都应该能够感受到咩嘢叫做多嘢卖，乜叫做物质丰富。对于我呢嗰新入行嘅日本迷来讲，香港真系一个不能不去嘅地方。起码香港能够俾我见识到咩叫多碟卖。相对于广州呢个所谓嘅大城市来讲，香港俾我见识到乜系一国两制，原来两种制度真系有着咁大嘅分别。香港呢嗰自由港真系名不虚传，我所见到嘅CD种类多到吓死我。由行货到水货，新碟到二手碟，卖到成行成市。卖正版碟嘅店铺多到好似广州卖翻版嘅店铺咁，如果要去认真研究每间，起码要一个月。对于我呢嗰买正版碟嘅人来讲，当然要系香港搜略一番啦，不过唔系乜都买，而系要买D广州买唔到嘅嘢。
有咩碟系广州唔多见有得卖嘅呢？就系三寸细碟。日文碟最有趣嘅一样就系有三寸包装嘅细碟。如果一只CD变成12CM嘅格式，就大多系一只大碟了，即系所谓嘅ALBUM了。我咁难得先可以去一次香港，当然要买多D三寸细碟了。买三寸碟就成为第一次去香港嘅目标。（当然包括游览） 去买三寸碟，当然要先去揾CD铺。咁去边间好呢？因为唔熟路，所以揾咗好耐都唔识边到有CD铺。不过始终系有缘嘅，俾我去铜锣弯行街嗰阵撞见咗间HMV嘅店铺。第一次去香港嘅CD铺，心情当然紧张，初进门口，就有好多海报贴咗出来做宣传。当然啦，好多海报都系港台明星，所以我都冇乜留意。虽然铜锣湾间HMV只有一层，地方却一D都唔细。起码都两三百方。放CD嘅柜台都同广州嗰间差不多（系广州嗰间抄佢）。因为实在大，而且又将各种CD分咗类别，冇办法，要想快D揾到日文碟放边到，所以只有问人。工作人员讲我知挂住好大个吉川日奈海报嘅嗰个柜台就系了。原来当时吉川只新大碟正在做紧推广，港版只卖145蚊，而且又有好多礼品送，类似D咩笔呀，簿呀之类，最靓似乎就系装CD嗰只袋了。粉红色透明嘅，非常配合吉川只新大碟《I’M PINK》。不过我当时唔多中意佢，一D都冇捻过买。系卖日文碟嘅柜台，最能够引起我注意嘅，当然就系放三寸碟嗰到了。因为好多三寸碟都系日本版，所以包装精美唔使讲，价钱亦都贵到飞起。我见到D价钱就真系连只碟系边嗰嘅都唔想买了。一只日本版嘅三寸碟最平都要85蚊港纸，如果系Kinki kids又或者Smap嘅细碟，唔使一旧水都咪想拿走。98年SMAP就真系好红，细碟《夜空的彼方》过百万嘅销量，使SMAP成功地跃到另一个高峰。所以SMAP当其时嘅碟大碟我都好想买，不过当我睇到嗰价钱嗰阵，都拎唔落手了。日本版280蚊，港版都要140蚊，你话嗰间HMV系咪想杀人。经过我仔细嘅研究，发现最抵买嘅就系Le Couple嘅亚洲版CD。只碟唔单至平，卖105蚊，而且又有两只歌PV嘅VCD送，一只正版能够做到咁，已经算系抵吃夹大件了。另外一只就系安室嘅VCD PV集。亦因为相对平，所以买埋。8只歌嘅PV集，卖80蚊，都算唔错了。 帮趁完HMV之后过咗几日都冇去过CD铺了，一方面要去玩吓，另一方面亦都因为唔多见到再有其他有好多日文碟卖嘅CD铺了。（旅游点又点会有CD铺呢）哎~~~ 再次买碟，要等到一次去旺角行街嗰日了。旺角真系够晒犀利，人又多，卖嘅嘢又多，真系‘旺’了。系行街途中，又俾我见到另一间CD铺。不过呢间就系私人开嘅，所以水货相对多D了。唔好睇少水货呀，因为来货平，所以如果遇到买唔出，就真系好快跌价，当然，我就捡到好几只相对平嘅碟了。 《hate tell a lie》华原朋美 呢只碟就系卖60蚊港纸。买佢嘅原因好简单，因为我几中意呢只歌。当然呢只系一只三寸碟，所以包装相对简单。除咗贴住系Knebo嘅广告歌之外，最特别就系用日文解释咗首歌嘅歌名系咩意思。如果大家未见过，亦可以去揾吓D打口碟，呢只歌绝对系好好听嘅，小室最得力嘅流行歌节拍，我就系因为识唱先买呢只细碟拿来唱K。 《tumblin' dice》华原 上一只细碟平卖唔出奇，因为都系旧年嘅碟了，反而呢只碟平卖我就觉得惊奇了。呢只碟系华原转投新唱片公司华纳嘅第一张细碟，理应可以按返以前嗰势继续高销先至系嘎，点会咁唔掂搞到要平卖呢？原因其他都几简单，除咗华原本身开始下跌嘅人气因素之外，只歌本身就系唔掂系另一个主要原因。有一个更过瘾嘅讲法，就系话逢系歌手转新公司，都会有销量下跌嘅情况出现，而华原本身亦都唔例外哦。 《here we are》华原 同上一只细碟一样，出咗几日就俾人当平价碟卖，虽然系60蚊啫，不过作为一只新细碟，点都唔会咁惨呀嘛，见到呢只细碟都同上一只细碟咁卖法，都唔到你唔信华原嘅人气唔单至系日本下跌，而且更蔓延都香港添了。虽然呢只细碟系一只日剧嘅主题曲，但是亦都唔能够挽救人气下跌嘅华原。不过只碟有凸字面，都几靓。 《orange》auga yaya 唔知大家识唔识呢嗰大贺呢？我买呢只碟系因为佢有少少似华原嗰样，开头仲以为呢只系华原嘅细碟添。反而只歌亦都唔错，比上面嗰两只华原嘅细碟好得多，Cozy Kubo亦系小室嘅创作伙伴之一，不过呢只歌就睇得出，Cozy Kubo对作girls pop嘅歌一D都唔差，铃木亚美有D歌都系佢作嘅。 因为实在系难揾到其他又多日文碟卖，又多平碟嘅CD店铺，所以呢次去香港真正买到嘅碟就真系唔算多，除咗上面嗰几只碟之外，最值得介绍嘅就系以下呢几张碟了。 《明日春来了》松隆子 
买得呢只细碟，当然就系因为好中意呢歌啦。呢只系松隆子嘅出道细碟，由日向大介作曲，坂元裕二作词。只歌其实系好适合俾松隆子唱，特别系作为一首出道歌曲，首先要俾听者留下一个好印象，然后先会有人留意佢其他歌。而流畅活泼就系呢只歌俾人嘅印象。对于一个本来作为一名演员嘅松隆子来讲，能够俾人系歌里面留下一个好印象，对于演戏来讲亦有正面作用。当然，我买呢只细碟唔单单系中意，更因为想唱K。 《SAKURA FUWARI》松隆子 
一只系樱花季节发行嘅细碟，实在应境。似乎松隆子系好想表现自己嘅创作意欲，细碟歌同C/W歌都系由佢自己作词。松隆子作词嘅水平唔多高超，但当时来讲已经唔错了。能够利用简单嘅歌词写出樱花季节时自己嘅爱情观，好贴切，好舒服。当然亦唔能够睇小武部聪志嘅作曲同埋编曲能力，如果冇咗佢咁出色嘅做作编，呢只歌仲边会咁好听呢？细碟版系同大碟版唔多同，当然就系编曲嗰方面啦，有听过细碟版就知道嘎了。 《对不起》松隆子 <img src=http://www.universal-music.co.jp/matsu/images/06sg.jpg 一首节奏比较快嘅歌，显得首歌好快咁。不过只歌一样系武部聪志嘅作品，填词就由前田TAKAHIRO做，亦都系适合松隆子唱，虽然好听，不过我就冇乜好感，唔错关心。 《真冬的MEMORIZU》松隆子 
一样系武部聪志同前田TAKAHIRO嘅共同作品。不过呢只歌就正好多，因为系一首为圣诞节而作嘅应境歌。歌曲本身就系会使你感到爱情系点样一回事，相恋二人在同乐嘅圣诞夜却不能在一起，想相会却难以开口嘅一种状态。能够使同在圣诞节嘅每位恋人都有着是否相同嘅感觉。此歌的确抒情，值得一听。 《打开心扉》ZARD 曾经讲过我系一只精选里面认识到ZARD，而所听嘅歌就系呢首。呢首歌曾经系宝矿力嘅广告当中播出，亦使我更加留意佢。呢只歌正系ZARD当红时期嘅歌，水平亦不在话下，最能感动人嘅正系ZARD嘅歌词。最欣赏此歌系广告中播出时，画面正是两位朋友的在相互的支持下，努力面对问题，配合此歌就真系实在再适合不过。当然就系因为歌词应境嘅关系啦。再配合完美嘅编作，实在系ZARD嘅名曲呀。 《夜空的彼方》SMAP 似乎只要听过此曲嘅人都会中意呢首歌。SMAP嘅FANS就更加唔使讲啦，我讲嘅系其他人。呢只细碟系98年最高销量嘅细碟。我亦觉得当之无愧。我都唔记得系边到听过呢首歌而使我中意佢嘎了，总之点到觉得买得好值，简直就系一首经典歌曲。 第一次去香港，都算系叫做见识一吓，不过都讲过真正买到嘅好CD就真系唔多，买嘅碟差不多都系买晒三寸碟了。可能我当时实在中意三寸碟嘅包装，觉得好特别，所以买咗几多。不过受到之前个人喜好影响，主要系集中系华原同松隆子身上，并不能代表D咩。而且因为揾唔到咩好CD店铺，亦使碟买唔到几多，不过HMV却去咗好多间，沙田，尖沙嘴，铜锣湾，中环，多间分店都去过了，总算知道连CD店都有分店，仲要系咁大间嘅，所以第一次去香港就系叫做见识咗世面了，原来世界真系好大嘎。 |
|
[关闭][返回] |