发信人: gamba(VR射手修炼中)
整理人: kobayakawa(2002-03-01 02:39:24), 站内信件
|
通过97年对日文歌嘅感情蕴漾，到咗98年之后，到达一个新嘅境地。再唔系作为一个普通追星族嘅心态来听歌，亦即系讲听日文歌并非为咗追潮流，赶时髦，完全系为咗自己。为自己慢慢地成为一个日本文化嘅追随者而去努力地改变自己。从自己身边嘅事情做起，从自己嘅思想里面去改变自己。好似好傻，但系咁先至系一个我，我发觉我自己好应该系咁，唔应该做人做到无所事仕。其实讲得唔好听，自己就慢慢成为一个‘嘎仔’了。虽然我都有点受不了，但我亦好落意人地咁叫，起码系人地个心目中，我已经有所转变了。
似乎真正地作出第一步嘅转变，就系买正版。要知道系日本系冇所谓嘅翻版呢嗰概念。其实好容易就睇得出。相对于普通人来讲，买正版好似系一样遥不可及嘅事情。而且不但是经济方面嘅原因，似乎从人嘅思想上，亦存在一定嘅因素去阻碍大家去进行所谓嘅高消费行为。正正系呢一点，使我更觉得此乃我于一般人嘅差距。能否做到呢一点，好大程度在于是否付诸行动。而且要作为一种区别，或系作为一种对自己爱好专著嘅表现，我只会买日文碟，其他碟睇都唔会睇一眼。慢慢地，我已经被呢种思想围绕住，直至现在。虽然现时已有所改变，但我仍然离唔开呢一点。
做任何事都会有一个开始，买正版碟嘅事情就始于广州嗰间音乐无限（HMV）嘅开幕。（呢键HMV唔系真正嘅HMV，后面会介绍。）当天正系星期日（或六，唔记得，总之就系放假），按照每星期嘅惯例都会去友谊商店走走。似乎我系同买碟有D缘，嗰日正系HMV开幕，而且撞正谭咏麟做嘉宾作剪彩。当日嘅气氛好热烈，我都系第一次睇到剪彩都可以咁多人睇，或许明星效应。当我知道系一间CD店开幕嗰阵，我想到是否应该睇吓有乜日文碟呢？如果有我中意嘅，我都应该会去帮趁一下佢。似乎当时我系好紧张，因为话晒都系第一次买正版碟，对于呢样咁高消费嘅行为，始终有点担心。我成日系到捻，如果次次买碟都买正版会否能支持下去，呢样唔系讲玩，下下百几蚊。虽然现时系因为过年之后先有钱啫，咁到洗晒D钱又点算呢？冇可能再会有咁多利是钱洗啦呱？困扰住我嘅，都系一般唔去买正版碟嘅人都有嘅主要问题。我想之又想，其实最终都系一个钱字。如果我真系要去买碟，首先就要克服呢嗰首要难题。其次就系能否坚持下去了。要去克服钱方面嘅问题，就系要去揾钱，咁点先可以揾到钱呢？对于当时我系一个学生又揾唔到钱，最好嘅方法就系洗少D钱，努力去储钱。当我下定决心去储钱之时，问题就自然想通了，所以，我走进HMV，去睇吓有乜日文碟我买得过。
入到店里面，发觉好多嘢都好正。先系装修，里面嘅装修同真正嘅HMV差不多，等人睇落去，直头系去咗HMV咁。然之后就系明星嘅POSTER啦。可能之前我未见过真正嘅宣传海报，点都觉得呢到好正，咁多海报，真系睇到眼都花埋。要知道我地平时买嗰D海报都系流嘢，复制嘅。原装海报睇落去真系好正，唔单至光滑新净，而且纸张质地好，纸身较硬，而且耐用。搞到我越来越觉得坚嘢真系好好多，似乎正版货卖得贵，真系好佢嘅道理系到。
睇完晒D环境，就梗系第一时间去睇吓有乜日文碟。走到摆碟嘅柜位，真系睇到我五花了乱。虽然现时觉得当时摆得系到嘅碟唔多正，但嗰阵睇落已经唔错了。首先见到最多嘅系中山美穗同工藤静香嘅大碟，其次就系小室家族各成员嘅大碟。差不多系96，97年当红嘅歌手嘅大碟都有。而且都系我地一般人比较熟悉嘅歌手多。其实衣家睇返，都系一般啫，虽然碟嘅种类系多，但真正值得买嘅唔系好多。而且真正能反映日本当时潮流音乐嘅碟始终系少。可能因为广州太容易受香港影响嘅关系，大多我地认识嘅日本偶像都系从香港传入来嘅，少咗自主性，所以我地所认识嘅真正好嘅歌手比较少，都系大路嘅偶像多。不过系当时能有间咁多现货卖嘅CD店，已经算不错了。
我按《偶像频道》呢本书嘅介绍，慢慢睇柜位到有乜碟。如果按照当时日本嘅潮流，最红嘅当算安室以及华原。两位都系当时得令嘅红偶像。安室同衣家AYU差不多，都成为日本女高中生嘅模仿对象，而华原朋美就比较大众化，亦系一位唔错嘅IDOL。当时我选到两张大碟买，一张系安室嘅《Concentration 20》同华原嘅《LOVE BRACE》。我发觉安室只碟实在好听，买只正版亦唔错，但华原作为小室当时嘅爱将，只大碟亦属于高销量，应该唔会差得去边。似乎当时好难决定。所以，我当时左想右想，我仲系捡咗华原只大碟，点解？第一，首先就系只大碟确实系好听，因为佢作为一个时期嘅人气偶像，而且只大碟又咁高销量，可听性绝对高，其实都唔使介绍了。第二，我未听过佢嘅歌，又是否应该买佢呢只碟，作为一个见识呢？第三，最主要嘅就系安室只碟我已经听过，买过只翻版了，无谓再去买过只正版，虽然系好好听，但是否应该让一个机会出来买其他碟呢？俾个机会人地，就即系俾嗰机会自己，系好值得嘅。第四，就系呢只碟翻版冇出过，我亦未见过，能够听到另一个人嘅音乐，似乎亦只有买正版碟做得到，同时我亦明白到一个道理，就系正版碟种类始终俾翻版碟多，呢嗰系不争嘅事实。
就这样，我系柜位，亲手拿起呢张《LOVE BRACE》，并俾咗钱，完成咗一项壮举。
返到屋企，当然第一时间听。并一边睇中文介绍，一边去熟悉华原朋美。（因为只碟系港版）当时我听呢只碟嘅时候，仍然系带有明显嘅偶像性听歌心态。亦即系话，听歌嗰阵，好注重副歌嘅流畅程度。当然，有好多人听歌都系比较注重呢方面。其实好唔好主要都唔系在于副歌嗰到，其实系有好多方面嘅（我亦都讲过吓，可以参照其他文章）。但系当时来讲，已经算系一种听歌模式了。可能我听嘅歌仲未算多，亦即系讲接触过嘅音乐仍然系好少好少，所以，当我第一听《LOVE BRACE》嘅时候，已经确立咗一种听歌嘅心态。因为先入为住嘅关系，就算现在好多人都觉得唱《LOVE BRACE》嘅华原朋美唱歌系完全唔得都好，我始终都系觉得佢有佢嘅魅力所在。佢之所以可以感染到我，一个就系每首歌都有其优美而朗朗上口嘅旋律，另一个就系华原所散发出嘅特殊女人味。只要大家去睇吓大碟封面就知道，真系设计得好靓，好容易会俾封面所吸引。当然，华原嘅女人味能否感染大家我唔去讲，我想讲嘅都系大碟里面嘅歌。
引用中文介绍里面一段话：‘大碟里面有一段象连续剧开头般的序曲，而最后小室柔美的钢琴SOLO《I BELIEVE》为这作品集做下罗蔓蒂克的结尾。’其实这就简单地对这张大碟进行了叙述。大碟里面包涵了四张百万销量嘅细碟，已经可以说明大碟嘅可听性系有几高。《KEEP YOURSELF ALIVE》系讲华原身边嘅事，可以讲系华原嘅写照，能作为一张出道的细碟，亦有其重要嘅意义。此曲流畅嘅副歌，使人亦会边听边唱起来。《I BELIEVE》讲嘅系对未来嘅渴望，表达咗不满足现状，绝对要去开创更好嘅明天咁样嘅一种决心。绝对系一首大快人心嘅歌曲。按小室所讲，利用华原嗰把有刺激眼泪嘅声音来唱，更具韵味，更容易使人感到自己要坚强下去咁嘅一种感觉。而作为《I’M PROUD》呢首名曲，更不能不值得一提。能作为一首受大众欢迎嘅卡拉OK冠军歌曲，自然就有佢优胜嘅道理。圆滑嘅编曲，动人嘅歌词，美妙嘅旋律，好容易就会使大家喜欢。《LOVE BRACE》更系一首得奖歌曲。首歌简直就系当时小室同华原嘅写照，关系融洽，就好似两只扣埋一齐嘅躅咁，永不分离。大碟里面其他歌更唔使讲，正系当时小室最成功嘅反应。利用其出名嘅电子音乐带起每首歌，再加上前卫嘅编曲，简直就系正到痹。
当时，我听完只碟，越来越觉得我落嘅决心系冇错嘅，好值得。买得好。
就系咁，买咗我第一只正版碟了~之后半年就开始咗我嘅买碟历程了。直到暑假去咗香港，先知道乜叫做小毛见大毛。
|
|