发信人: gamba(VR射手修炼中)
整理人: kobayakawa(2002-02-26 00:03:24), 站内信件
|
究竟中国有几多个酒井法子嘅FANS呢？呢样嘢真系好难讲，都唔知到点答。差不多每一个喜欢日文歌嘅人都识得佢，而且连一D唔听歌嘅都识，点解？因为我地不但系音乐方面受到佢嘅影响，而且系演出方面都受到佢嘅影响，从而使我地认识到日剧嘅魅力。好多人就系从睇日剧开始认识酒井，而并非从音乐方面开始留意佢。我就系其中一位啦。
如果大家系广州人，就一定睇过《星之金币》呢出戏。当然，呢嗰系亚视做过嘅电视剧。虽然做嗰阵唔系用日本名，而是改咗叫《等你说爱我》，但似乎改咗名都唔影响呢出戏嘅魅力。当时能成为亚视嘅高收视节目，可以讲完全系呢出戏嘅实力所在。之后当然做埋第二集，亦相当精彩。
其实就系从呢出戏开始，我慢慢留意到酒井法子呢嗰人了。当时我差不多每集都有睇，但睇嘅唔系剧情，我并冇心情去关心剧情，我睇出戏就系为咗睇靓女。每集都系为咗睇酒井而睇。除咗系为了满足自己视觉上嘅需求，最主要都系一种对日本女人嘅感情结。由于以前所形成对日本文化嘅感情结，慢慢转变向对其他与日本有关事物。当然包括女人。我觉得日本女人就好似日本文化嘅一种反映，一种现实的写照。差不多我钟情于日本文化，就等于钟情于日本女人一样。
而当一个咁日本嘅酒井法子系我面前时，很容易就会成为我心目中嘅偶像人物。所以系97年，对我最大影响嘅，就系酒井嘅出现，不但使我感到世界上居然有咁靓嘅人，而且从佢开始，真真正正地感受到日本音乐。慢慢地，我开始走在听日文歌嘅路上。
似乎我就系一个不惊不觉嘅情况吓听起日本歌，但说真的，如果冇之前受日本文化咁深嘅影响，又似乎唔会一下子变得咁快。正所谓‘冰冻三尺非一日之寒’，如果冇咗由小学到中学所形成嘅一种对日本文化嘅感情结，其实系好难嘅。就好似一个烟花咁，如果之前做得唔好，到烧嗰阵，都烧唔到；就算烧得到，整烟花嗰阵做得唔好，其实烧嗰阵亦唔会好睇，可能会烧到半路中途就熄咗了。但当整嗰个烟花嗰阵认真制作，要睇靓烟花，就只是需要一条导火线就得了，而能燃烧起我对日本音乐的兴趣，酒井法子嘅音乐呢条导火线嘅功劳真系功不可没。
提起酒井嘅歌，应该冇人唔识《碧绿色的兔子》呢首歌。呢首歌直头就系酒井成名之作。虽然酒井唱呢只歌之前已经发行过好多张唱片，但亦有呢只歌系大热作品。因为当时佢乘住演戏嘅成功而使佢系唱歌方面获得成功。其实就同衣家松隆子差不多。而呢首歌不但热卖，而且更系当时卡拉OK之选，可见呢首歌系几咁成功。而我，就买咗第一只日文CD，虽然系老翻，但呢只翻版就真系好重要。只老翻系一个里程碑，系一个重要嘅开始。虽然买呢碟都系为咗听《碧绿色的兔子》呢首歌，但对于我呢嗰成日唔多买碟嘅人黎讲，已经系好难得啦。我以前系一个唔中意买CD嘅人，但又想听歌哦，咁点办呢？唯有拿人地嗰D碟来听就算啦，而且又唔还嗰只。不过自呢只《我爱美人鱼》开始，我觉得自己都应该为自己喜欢嘅嘢付出多少嘎啦。《我爱美人鱼》并非酒井嘅大碟，其实系一只香港JVC公司拿咗日本嘅版权自己做嘅一只酒井嘅港版精选碟。里面有几只系之前嘅大碟歌，当然包括《碧绿色的兔子》，而且仲有只就系佢用国语同孙耀威合唱嘅《有缘千里》，同埋其他佢用国语改嘅歌，都几经典嘎。呢只碟其实都唔使点讲，绝对系一只经典嘅CD，至少对我来说系。虽然唔系一只原装嘅碟，只是一只大集锦，但却使日文歌对我影响深远，使我对日文歌更感兴趣。
自对日文歌产生浓厚兴趣之后，买碟就成为一个必要嘅行动。当时嘅翻版风气正胜，差不多冇乜会考虑到翻版同正版嘅分别，对于一个消费者来讲，只要俾咗钱有得听，咁几好呀，公平交易，而且更重要嘅就系平呀嘛。所以，我走浑各大买碟地方（咪就系翻版集中地咯），差不多都将市面上所见到嘅日文碟买晒返黎。有几只系好值得我去介绍嘅，可能大家都应该听过，正版都有添。
《un》友坂理惠
呢只碟绝对系精彩，如果以衣家嘅眼光去睇，呢只碟唔单指有出名嘅作曲家同作词家，而且编曲出色，系一只纯正嘅POP大碟。但对于当时嘅我来讲，除咗系因为友坂嘅名气之外，就只是因为我对日文歌嘅崇拜先至买嘎啫。碟里面除咗有《想哭》同《二人》呢两只出色嘅歌之外，我最熟悉嘅莫过于《Escalation》呢只歌，点解呢？其实完全系因为我听过一只精选之后先买呢只碟嘅啫（嗰只精选会介绍）当我听完呢只碟之后，发觉日文歌实在系太有魅力了，咁其他又会系点嘅呢？从而促使我会去买其他碟了。
《Paradox》相川七赖
去买其他日文碟嘅时候，发现好多地方都有相川呢只碟卖，嗰阵真系觉得好过瘾。心想唔通佢好出名嘅？咁出名，可能好好听都唔定哦。所以，我抱住呢嗰尝试嘅心态去买咗呢只大碟。当然，答案系肯定嘅。唔单至觉得好听咁简单，而且仲使我感到ROCK究竟系咩嘢一回事。当中最使我感受最深嘅唔系其他细碟歌，而是大碟歌《若可变成鸟儿得话》。其旋律之优美，系我意想不到嘅，特别系开头嘅一段，真系感受深刻。孱孱嘅流水声开始，慢慢导入音乐，好容易就使你堕入到首歌里面。当时我听歌嗰阵系做作业嘅，都忍唔住要停笔，细听此曲（其实我一向都唔多系屋企做作业，嗰日例外）。如果大家有听过呢只碟，此曲绝对系精彩之出。或许系先入为住，现在反而觉得细碟歌都唔够呢只歌正，虽然细碟一样系非常出色，非常嘅织田哲郎，但我仍然觉得呢只歌系大碟最精彩之处。
《Concentrantion 20》安室奈美惠
都应该冇乜人唔识佢咯，96，97年日本最红嘅歌手。所以只大碟都唔应该唔提一下。虽然呢只大碟嘅销量仲唔够《sweet 19 blue》犀利，但系97年呢只大碟都一样系咁出色。除咗里面有《Can you celebrate?》一歌之外，其他出名嘅细碟都一嘢收录晒。其实只大碟就系小室实力最好嘅体现。都唔使讲D乜，买呢只碟除咗想听《Can you celebrale?》，亦都要拜安室嘅名气。如果唔系安室咁高嘅名气，我又点会系翻版档到买到呢只碟呢？又点会认识到佢呢？
《FACES PLACES》globe
globe的大名，我都系从呢只大碟到识返来。我系第一次认识到小室嘅电子音乐。以前都系得过听，都未真正亲身感受过。听过之后先发觉原来电子音乐都可以系咁鬼正嘅。虽然当时我听歌都系听旋律嘅多，而且更唔会去探讨歌词究竟讲D乜。但能就这样使出我中意嘅大碟就唔多见了。可见小室系几咁犀利。相对衣家来讲，以前听歌系简单咗D，只是听旋律，但亦已经足够使我喜欢上一队乐队了。不过当时我并唔知道里面有D乜人，只是知道佢地亦小室为住，加多咗个人咁啫。
《NOW JAPAN TV-CM SONG97》精选
呢只精选系一只广告歌同电视剧嘅主题歌精选。里面有齐96，97年日本当红嘅偶像歌曲。久保田嘅《LA LA LA LOVE SONG》，南方之星嘅《爱的灵魂》，Dream Come True《七月七日晴》，ZARD《打开心扉》，友坂《Escalation》等绝对靓歌。听过呢只碟使我认识到更多日本明星，因为买之前，就只是识得酒井法子而已。虽然呢只老翻衣家不知所踪，但我仍然好怀念佢。不过有样嘢我要讲俾大家听，就系呢只碟唔系原唱，系翻唱嘅，反而嗰阵觉得买咗老翻好好彩~~
（其实仲有只老翻精选嘅，系台湾出嘅嗰D精选，系将D细碟捞埋一齐嗰种，不过要留返下次讲。）
97年最主要都系开始咗我听日文歌嘅历程，虽然同衣家有好大分别（全部买翻版），但亦不失为一个好开始。而且当时《偶像频道》一书，亦系我能得知日本艺能界消息唯一途径。大家亦唔好睇小嗰D翻版碟呀，我瞓医院嗰阵都系靠佢地挨日子嘎咋~~~
|
|