发信人: gamba(广州三船敏)
整理人: txstang(2002-01-31 09:01:28), 站内信件
|
《delicious way》 倉木麻衣（00/6/28発売）
呢只大碟无须多讲，可以成为二千年嘅销量第一肯定有佢成功之处。当然亦系我嘅最爱大碟，最主要嘅原因都仲系因为呢只大碟俾咗我好重要嘅感觉，系我第一次感觉到一只CD原来真系可以俾到人一种好好嘅回忆，对于我来讲，呢只CD实在太重要了，呢只大碟嘅重要性同L'Arc-en-Ciel嘅大碟《Heart》一样，使我毕生难忘。如果想知道呢只碟嘅重要性，可以参照我系呢只碟发行一年后嘅嗰日发嘅帖。
《infinity eighteen vol.1》鈴木あみ（00/2/9発売）
我好中意阿美，全因为佢活泼嘅形象，同衣家松浦阿儞一样，真系好讨人喜欢。而且我对TK嘅音乐一向都好中意，况且从安室到华原我都有捧场，何况系我咁中意嘅阿美呢？呢只大碟入面嘅歌差不多都系阿美嘅HIT歌，多首大热作品都一定会使佢嘅FANS钟情，当然仲有我啦。入面嗰首《EVIDENCE OF LOVE》真系好好听，虽然系经过特别处理，但亦无损呢只歌嘅味道。（最可惜就系我买唔到呢只碟嘅初回版，全因自己手脚慢，迟咗去定，因为当时呢只碟嘅初回版好抢手，系香港几乎冇货。不过衣家有返呢只碟嘅二手货卖，我都唔系几想买，始终都系唔系几好嘅，最后都系买只港版算了。）
《LUNACY》 LUNA SEA（00/7/12発売）
讲起呢只经典嘅大碟，绝对唔可以唔提我班同学仔。佢地听完呢只碟，个个都话要问我借，我话要听就不如去买翻版啦，又平又靓，点知道呢只碟系YF先浮过一轮头就冇得卖了，搞到D人将唯一嘅一只老翻借黎借去，借到烂晒哦。（好彩只老翻唔系我嘎啫）可以讲明一件事，就系好听嘅嘢就一定有人争，俗话讲瘦田冇人耕，耕开有人争就系咁嘅道理。每个听完呢只碟人都好中意嗰首《4：00 AM》同埋嗰首《KISS》。《4：00 AM》嘅旋律实在掂，好鬼正；而嗰首《KISS》就更加抢耳，因为呢首系讲ML嘅歌，睇D歌词都知道了，仲有里面嗰个女人嘅呻淫声实在妙。就听呢两首都值回票价了。仲有嗰首《VIGIN MARY》完全系LUNA SEA嘅实力表现，越听越正。
《synchronicity》OLIVIA（00/12/6発売）
好多人听讲过OLIVA呢嗰人，因为佢嗰队D&D以前都几似MAX，而且OLIVIA嗰样真系几正嘎。不过呢只大碟就真系冇几多人听过。据我所知，呢只碟除咗日本版之外，就只有台湾嘅AVEX公司出台湾版，可见佢嘅知名度唔系几高，系日本都系卖到几万张而已。不过，好嘅嘢始终系会发光嘅。OLIVIA自从从SOLO开始就玩起ROCK了，冇利用自己嗰样去揾吃，完全放弃咗以前嘅嗰种偶像嘅形象，非常自我。佢嘅音乐才华完全系呢只大碟到表现出来，特别系佢同LUNA SEA个鼓手真矢嘅合作做得非常好，亦有杂志对佢同真矢嘅呢次嘅合作做咗个访问添。虽然佢头两只细碟都系ROCK，不过并非佢自己嘅作品，所以都将嗰两首细碟歌放系大碟最后，可见佢对自己嘅嘢系几咁重视，好难得我地会见到一个咁有个性嘅女歌手，情愿放弃自己嘅样去搞自己中意嘅音乐，真系难得呀，大家要留意佢多D啦。
《REAL》L'Arc-en-Ciel（00/8/30発売）
佢地嘅呢只大碟应该会好多人听过，感觉如何，又或者系大碟嘅定性如何大家都应该讲过，讨论过。不过我都一样好想讲下我自己嘅睇法。首先就系我地要肯定呢只大碟嘅成绩。好多人都好中意99年嗰两只大碟，反而觉得呢只碟做得唔够好了，应该讲系唔错嘅。其实全因好多人都系99年先开始中意L'Arc-en-Ciel，我并非话嗰D中意咗L'Arc-en-Ciel更耐嘅人，或许好多中意咗L'Arc-en-Ciel好耐嘅FANS都一样觉得99年嗰两只大碟好。不过大家要知道乜叫先入为主，好多嘢就系因为先入为主而使到自己不能自拔。我就系因为系98年买咗L'Arc-en-Ciel嗰只经典大碟《Heart》，因而完全投入到《Heart》嘅嗰种感觉当中。利用佢所带俾自己嘅感觉去领悟《ARK》同《RAY》，所以我好耐都冇领悟到嗰两只大碟嘅精髓，因为我已经俾《Heart》嘅嗰种流畅感所迷惑了，完全都唔可以去感受到99年呢两只大碟所带俾自己嘅新鲜感了。所以要完全脱离实际中嘅感觉，还是要去多听多想，唔好俾暂时嘅感觉所迷惑，当然仲要多多结合实际。我地肯定L'Arc-en-Ciel呢只大碟嘅成绩，最容易一样就系多听听《finale》呢只歌，可以讲系成张大碟嘅精华，L'Arc-en-Ciel实力嘅表现。讲真，呢只碟并非俾咗大家一种另类嘅新鲜感，反而系好似一只具有试验性质嘅大碟，或许通过近期嘅SOLO活动会增加更多更好嘅音乐元素系以后嘅大碟里面，不过始终都唔希望L'Arc-en-Ciel呢只大碟会系一个《finale》。
《MACABRE》Dir en grey（00/8/30発売）
对于我来讲，VR嘅嘢我就一D都唔感兴趣（靓女除外）。因为以前觉得Dir en grey佢地成日系到瞓棺材嗰D咁嘅造型我吃不消。不过真正使我中意上Dir en grey完全系因为呢只大碟。我冇听过第一只大碟，所以我唔敢多讲D乜嘢，而且我又唔系D乜嘢VR嘅FANS。讲真《MACABRE》嘅出色，在于Dir en grey嘅编曲，作曲，当然仲有京嘅词。当我第一次听呢只大碟嘅时候，就认定Dir en grey系一队非常出色嘅乐队。佢地对大碟入面每首歌嘅编曲都做到好绝。只要你听过佢呢只大碟，就一定会感受到佢地嘅形象会系点，大碟里面嘅歌收尾呼应，一气呵成，讲都好难讲，只要你系中意夹BAN或ROCK，就一定会FEEL到佢地会系几正。（我唔系讲佢地嗰形象）
《桜の木の下》aiko（00/3/1発売）
aiko能够有今日嘅成就，系同佢嘅音乐才华分唔开嘅。《桜の木の下》呢只大碟绝对讲得上系一只经典CD。aiko用佢特有嘅音乐手法去阐述佢对爱情嘅感觉。当然，最主要嘅都仲系佢写嘅词能够感染别人。里面差唔多首首歌都咁上口都咁正，够晒POP，如果我都一样系堕入埋爱情礼貌里面话唔定我真系能够感受佢对爱情嘅睇法添啵。唔好睇佢人仔细细，矮矮地，如果你听过佢嘅歌，再睇埋佢嘅演唱会，你或许会中意佢都唔定。
《いつか、桜の雨に…》 松たか子（00/3/23発売）
呢只大碟系我生日前一日出，而我又系生日嗰日买到，实在系可喜可贺呀，仲要系初回版呀，难得。好多人都几中意佢，唔单至靓女，而且歌又好听。我就中意咗佢好耐了，差不多由佢出道至今，佢D歌实在系一成不变，但系又够晒抒情，够晒舒服，俾我就算佢只只歌都系咁都冇乜所谓啦，佢嗰样真系同D歌好衬嘎。呢只大碟入面以《夢のしずく》同《桜の雨、いつか》最受欢迎，不过日本人就比较中意《days》呢首，或许呢首比较平均，各方面都好呱。
《LOVE IS THE MESSAGE》Misia（00/1/1発売）
Misia嘅大碟一向都唔错，第一只大碟卖得几百万张就知道佢唔系流嘅。当然呢只都唔例外。虽然呢只碟嘅作曲同歌词都唔算好犀利，唔算好好咁啦，之不过胜在Misia自己嘅歌喉搭救返唔少分数。利用佢咁犀利嘅歌喉，再加上首首都系够晒正嘅情歌，边会冇人中意嘎。特别系最尾嗰首《love'in you》简直就系将佢嘅长处完全发挥，听出耳油。
《絶頂集》 椎名林檎（00/9/13発売）
我觉得《絶頂集》俾佢年头嗰只《勝訴ストリップ》要好，所以选呢只。里面有三只8cm嘅细碟组成，包装比较特别。而且海报又有型，真系好正嘎。里面有几首系现场录音，所以觉得更加正。如果你喜欢椎名林檎，一定会中意佢嗰种演绎手法，无可否认椎名林檎嘅音乐不但迷到各位中意ROCK嘅朋友，而且更能吸引其他人嘅注意力，实力不容忽视。
以上系本人系二千年里面最中意嘅十只大碟，要买嘅话绝对买得过。（当然你要信得过我啦）
《Soul Serenade》ゴスペラーズ
今时今日系日本应该冇乜人唔识ゴスペラーズ嘎呱？佢地系日本流行音乐史上唯一拥有五位主音嘅超级完美和声团体。而呢只大碟最要系因为收录咗超级细碟《永遠に》。呢只歌完全系一首唱十年都唔会落后嘅动人情歌，再加上以佢地咁动人嘅声线来演绎大碟其他嘅作品，如果呢只碟冇听过，冇买到简直就遗憾呀。
《THE CHANGING SAME》平井堅
因一首《乐园》而声名大振嘅平井堅，说明佢系完全适合唱R&B嘅，而且仲要系非常适合添。此大碟同一向嘅R&B大碟差唔多，最犀利就当然系平井堅嘅演绎啦，如果呢只大碟嘅歌唔系由佢黎唱，肯定冇咁卖得。碟里面嘅歌本身就够晒动听，真系听落好鬼死舒服，通过咗平井堅嘅深情演绎就更加正，绝对唔能够话唔好听。
《GENIUS 2000》安室奈美恵
由于呢只碟俾咗外国人去监制咗几首歌，使到只大碟增色不少。放弃咗以前嘅音乐类型，唱R&B比价多，而且系安室奈美恵复出之后嘅第一只大碟，再加上有好多都系由返TK做监制，就绝对唔能够话唔得了。虽然冇乜歌系非常特出，但仍然系一张好正嘅大碟，绝对系上乘之作。
《INFINITY EIGHTEEN VOL.2》鈴木あみ
如果讲《infinity eighteen vol.1》系似一位纯情少女嘅话，呢只大碟绝对系似一位调皮嘅靓妹仔。TK将阿美嘅风格做咗个转变，唱起HIP-HOP了。可以讲如果你听惯咗第一只大碟嗰种FEEL，就一定好难接受《INFINITY EIGHTEEN VOL.2》。因为整张碟都系有好重嘅HIP-HOP味，越听越唔惯，之不过能够将成只碟都做成咁，似乎都系得TK够咁嘅胆识。而阿美又真系能够通过呢只碟俾到人一种好得戚，玩皮嘅感觉。讲真呀，我都唔多想佢系咁嘎哦。
《SPIKE》PUFFY
PUFFY又真系几得意嘎，由佢地出道听佢地D歌到现时，都好中意佢地嘅歌。奥田民生真系嗰音乐能人，所创作嘅作品都系够晒POP，又好适合PUFFY哦。听过佢地D歌就会发觉PUFFY好有趣，好过瘾，而且又真系好好听嘎嘛。
《MOON》深田恭子
开头以为佢净系识影相俾人睇，点知道佢又识弹琴有识唱歌，系又两手哦。因为只碟里面有好多人参与制作，所以歌曲类型比价多，从而使成只碟听落比价耐听。恭子嘅声线唔算好靓，起码都可以出黎见人。好多地方都唱得唔错，唱ROCK有ROCK，唱POP有POP，都过得去嘎，一D都唔失礼。龟田诚治所创作嘅歌，特别系编曲方面做得很好，不愧为椎名林檎个御用监制。
《Duty》浜崎あゆみ
我系买呢只碟之前就发誓唔再做佢嘅FANS，因为发觉佢D歌越出越唔对路，越出越差。可能因为要揾钱呱，所以为咗赶工，都唔求咩质量了，卖得就系。只碟D歌又唔系全部都唔掂，只不过实在唔中意佢翻炒冷饭，其实只碟差不多系上一只《LOVEppears》嘅翻版一样，完全冇乜好嘢到。作为一个顶级嘅歌手，系唔系应该做好D，唔好咁求奇好冇？可以讲呢只系二千年最失望嘅大碟。
《TERRA 2001》 the brilliant green
其实呢碟我系2001年先买，因为我知道好多歌系英文歌，所以先前冇买到。我实在唔多中意英文歌，所以佢地呢只碟先头就真系冇乜好咁，只不过系之后又觉得要欣赏佢地就冇计啦。咁先买返呢只碟。虽然系有好多英文歌系里头，但始终都有几首日文嘅。日文嗰几首就真系几正吓，咪当听呢几首黎买呢只碟咯。
《eternity》Every Little Thing
从呢只碟嘅销量睇，ELT好快会系乐坛消失得无影无踪。销量果然系一样好现实嘅嘢，首先就可以反映出只碟嘅受欢迎程度，并可预示着未来嘅走向。呢只碟唔得，主要在于冇放弃到以前嗰种音乐模式。只碟嘅歌同上一张差不多，可以讲系犯咗AYU嗰只大碟同一个毛病。不过AYU人气正盛所以有人气作补救，而ELT主要都系靠实力，照抄旧嘢就一定唔掂，死梗。
《勝訴ストリップ》椎名林檎
呢只大碟绝对系一只经典，销量亦可以说明一切。不过对于我黎讲，适唔适合好紧要。我就系唔多中意椎名林檎搞埋咁多花神嘢。碟入面嘅歌实在多变化，如果睇过对呢只碟嘅评述或听过只碟嘅人一定都觉得只碟系唔错，椎名林檎可以将佢嘅音乐才华系呢只碟到表现晒出来，但对于我黎讲，都仲系中意佢第一只大碟《無罪モラトリアム》，其实都好难讲D乜，听过两只大碟就知道有乜分别了。
《WALLABY》Hysteric blue
Hysteric blue嘅音乐绝对适合大家一齐听，或许你唔中意主音TAMA把声，觉得好嘈，之不过你听多几次可能会有改观。自从Hysteric blue系红白唱过之后就好多人认识咗佢地，虽然衣家Hysteric blue并唔红，但系唔红并不代表唔好嘅，要知道佢地嗰监制系佐久间正英哦，D歌又点会唔掂呢？
《daiya-monde》矢井田瞳
虽然好多人都觉得矢井田瞳能够咁出位，好大程度都系得益于学咗椎名把声，先咁出位。但系你又有冇听过呢只大碟呢？听咗之后先好下定论。有时将人家好嘅学返黎应用得好，就系唔错啦。可以讲，呢只碟奠定咗佢系2001年人气高嘅基础，绝对系佢能够成功出位嘅一个主要原因。有时有冇实力就真系一耳就听得出嘎啦。
《BREAK OF DAWN》Do As Infinity
我觉得呢张系DAI做得最好嘅大碟，可能因为先入为主呱;又可能系因为《Yesterday & Today》呢只歌太吸引了;更有可能我觉得呢只大碟嗰封面太靓了,因为伴都美子实在系靓女呀;就算系咩原因,都一样讲得通呢只大碟系几正吓,非常流畅嘅DAI式嘅POP SONG．呢只碟唔能够入选十大，只是名额问题．
《FORXTROT》相川七濑
收录咗成五只细碟咁多，虽然细碟够多，但唔一定代表佢系一只好好嘅大碟。如果你系佢嘅FANS就当然唔会错过呢只碟，但唔系佢嘅FANS都一定唔好错过，为乜呢？虽然细有五只细碟收录咗，但有几首都唔算系上乘之作，同以前嗰D歌差D咁啦，最能吸引人都系大碟里面嘅歌，多D听就会发觉除咗细碟歌之外，大碟嘅歌一样掂嘎。不过呢只碟俾我嘅感觉好似系一只试验性质咁，下张会更好，所以2001嗰只就俾到我好大嘅惊喜了。
《ELEVEN》B'z
我觉得除咗《今夜月の見える丘に》之外，都好似冇乜歌能够感染我。可以讲，买呢只碟多数系为咗听呢只歌嘎啫。我不能否认B'z嘅实力，但我唔能够FEEL到佢地嘅音乐感觉又系一回事。我对于呢只大碟冇乜感觉，或许我认真唔掂。
《MARS》Gackt
我就系听过呢只碟，先真正认识到Gackt呢嗰人。虽然佢嗰人好花巧，但系大碟就一定都唔花巧，好实在。如果你系一个中意佢嘅音乐嘅人，就一定会中意呢只大碟。我比价中意大碟里面嗰D钢琴同埋佢把声，女仔一定会俾佢LUM死咯。
《ectomorphed works 》L'Arc-en-Ciel
L'Arc-en-Ciel能够有今时嘅成就，好大程度上系同YUKIHIRO嘅音乐才能分唔开嘅。呢只完全系YIKIHIRO嘅杰作，将佢嘅REMIX才干一次过表现出来。如果你系L'Arc-en-Ciel嘅FANS就当然唔会错过啦，但如果你系中意REMIX嘅都一样唔会令你失望而回，一样咁正呀。
《トビラ》ゆず
一只超级正嘅民摇大碟，不过系唱日文嘅。ゆず嘅歌能够带俾人一种畅快嘅感觉，有时又系一种沧桑嘅感觉，有时又系一种落幕嘅感觉，民摇嘅歌一向都受人欢迎，完全系因为佢有一种使人有亲切感嘅歌曲类型。好多人都几中意ゆず，亦都系全因佢地有着同民摇一样嘅感觉。
再讲讲另外几只精选：
《GREATEST HITS "THE SOUL"》DREAMS COME TRUE
呢只碟实在经典，冇买到就真系筛晒啦，有两只碟添，一只够晒流畅，另一只够抒情，唔买走宝。
《DRIVE》Glay
GLAY嘅精选同样系正，同样系有两只碟，又系唔买就走宝，仲有就系冇人够我买呢只碟平~哈哈。
《FRESH》JUDY AND MARY
都话明系精选咯，就梗系正嘎啦，仲要系JUDY AND MARY哦~~
《Passage》知念里奈
我对佢呢只碟就一D都唔失望，只是佢嘅星途就认真暗淡，信我，虽然佢唔多掂，但系唔代表只碟唔得嘅，至少话晒都系精选呀~
用咗成嗰下午写，都几辛苦吓，大家睇吓啦，仲有D乜意见可以回复嘎哦。虽然二千年唔够2001买得碟多，不过大碟都买咗几十只啦，唔少嘎啦。
|
|