发信人: jason_choi(钝猪.成成)
整理人: bobbytam(2001-06-15 13:40:54), 站内信件
|
每晚有线嘅广告插播都会播乜好为人民谋幸福嚟歌颂你哋嘅党，晚晚咁听，都听到个人麻木哂了，但系今晚听到呢只歌就觉得额外刺耳。
今日中午同旧公司嘅同事食饭，闲谈之间讲起一个同事因为实群众“检举”出佢违反计划生育而要停职调查，连离开广州都要经过老总批准。听同事讲原来有人话佢喺呢个仔出世之前曾经有一个私 生子。畀人发现咗之后，公司啲总经理会畀上级组织降职，计生主任会扣奖金，就连同佢毫无关系嘅一般同事年终奖都要扣减。脑海里面出现我个同事嘅形象。四十岁左右，中等身材，平时沉默寡言，工作表现唔出色。但为人老实。
听到呢个消息之后，我个心好沉重，首先，两个细路仔嚟到呢个世上系无罪嘅，第二，无错，个老窦系违反计划生育，但系至于得到咁嘅结果咩？第三，与其毫无关系嘅同事又有义务同佢承受呢种后果咩？
如果真系如我啲同事所料，我同事嘅后果会系，原来分到嘅一厅一房会畀人收番，罚款至少两万，最后连呢份工资唔高嘅工都冇埋。迎接佢嘅系居无定所，作为家庭主要嘅经济支柱失业，老婆系乡下人，无文化，喺广州根本好难揾到工，就算系佢。呢个年纪，呢个情况都好难揾到好工。原本幸福嘅囡囡会面临节衣缩食嘅环境，受唔到良好嘅教育，最后好难喺呢个竟争激烈嘅社会立足。。。可怕嘅后果我唔敢再去谂。因为佢哋面临嘅困境可以比我想象要艰难一百倍。
面前浮现嘅系平时笑笑口嘅办公室兼计生主任，此时佢嘅笑容已经转成一个恶魔嘅面吼对我个同事进行审判，最后将所有责任对我同事身上推得一干二净。唉！
其实中国嘅计划生育政策真系要咁咩？如果佢违反政策真系要受到失业，罚款，农村嘅会被收田。更或者被抢去家中财物作抵数？咁最后嘅结果将会将一个已经要养多一个人嘅家庭带来悲剧式嘅后果最重要嘅系会对我嘅国家下一代嘅成长不利。
成日话共产党嘅出生为人民带啲幸福，但系咁嘅政策真系带嚟幸福咩？定系将新嘅三座大山带畀呢啲民呢？称最民主，最重视人权嘅国家点解仲有啲违反人性嘅政策奉若基本国策呢？国策？国贼？
希望呢啲违反人性嘅计划生育政策从始喺中国大地上消失。
----
大千世界，無掛無碍，自去自來，自由自在，要生便生，莫找替代。
《無名偈》 |
|