发信人: jason_choi(仁面秀心--大头成)
整理人: lzyboy(2001-06-06 13:20:22), 站内信件
|
近一段时间各媒体，从市民到高官口中都提到购物卡呢个名词，听讲过年放假嗰几日，有发行咗购物卡嘅大商场买到现货都冇，要卖期货添。但系大家都对呢张小小购物卡抱住一种视之为洪水猛兽嘅物品，乜破坏廉政风气，腐蚀共产党员，不平等竞争，扰乱金融秩序。。。
但系大家静心想一想，一张小小塑胶卡片系唔系真系有咁大嘅腐蚀性，连高尚嘅共产党人都可以蚀得剩低赤祼祼铜臭嘅灵魂啊？我唔系化学家，冇咁高知识去解释。用另外一种角度去探讨下购物卡，或者可以睇清楚一啲嘢。
如果大家见到一个人揸住西瓜刀，你估佢系劈友定系去切西瓜呢？大家一定唔敢妄下定论，如果话系去切西瓜，当然大家开心，又可以做一次兰茜啦，如果系杀人嘅话，咁做刀嘅厂家又要付出几大嘅责任呢？同样道理，购物卡只不过系一种商家促销嘅手段啫，就好似期货交易一样，你预付咗货款，我商家风险降低，所以我成本可以降低，张卡就算有折扣卖出嚟畀你都好正常啫。
但系购物卡持有人，大多数系一啲乜人呢？据我所知，都系啲政府部门，国有企业占多数，外企，私企占小数，为此大家心中了了。政府部门嘅高官靠呢啲嚟直接或变相受馈，国企嘅人靠呢啲嚟千方百计逃税。做成呢啲现象都系因为缺乏监管所致。你哋政府，你哋个执政党做乜唔做好自已嘅职责，唔管好自已啲o靓，反而将所有啲罪名扣喺一张小小卡片度呢？
----
话我花心？我系花生啊。花花世界中一个纯情小生。
|
|